Baadiye: HORYAAL
koox eedaysaneyaal loo haysto kiiska dilka Taliyihii qaybta 12aad ee Ciidanka qaranka ee horaantii November lagu dilay Laascaanood, ayaa la sheegay in shalay loo wareejiyay magaalada Berbera ee xarunta gobolka Saaxil.
Siday xalay faafisay idaacadda Horyaal, Maxaabiistan oo 11 qof ka kooban, waxaa ka mid ah Taliyaha Sirdoonk qaranka ee gobolka Sool Cabdifataax Muuse Yuusuf oo ka mid ah dadka loo haysto dilka Taliyahaas.
Warku wuxuu intaa ku daray, in Xukuumaddu olole u gashay sidii Maxaabiistaa looga soo wareejin lahaa magaalada Laascaanood, ka dib markii hoggaanka Ciidanka iyo ehelada Taliyihii la dilay ay diideen in meel aan Laascaanood ahayn lagu Maxkamaddeeyo eedaysanayaashaas.
Ilaa hadda ma cadda sababta keentay in Maxaabiistaas loo wareejiyo magaalo-xeebeedda Berbera, looguna Maxkamaddayn waayay magaalada falka dembiyeedkaasi ka dhacay ee Laascaanood.
Dhinaca kale, magaalada waxa weli ku sugan magaalada Laascaanood wefti Wasiiro ah oo Xukuumadda ka tirsan, kuwaasoo muddo todobaad ka badan joogay gobolkaas.
Isgaadhsiinta magaalada Laascaanood ayaa todobaadkan oo dhan go’an, ka dib markii Xukuumadda Somaliland Shirkaddaha Isgaadhsiinta ee ka hawlgala ku amartay inay demiyaan khadadka telefoonada gacanta ee Mobile-ka iyo Internet-ka.
Weftigan Xukuumadda ka socda ee socdaalka u jooga Laascaanood oo uu ka mid yahay Wasiirka Daakhiliga, waxay sheegeen inay degaankaas u joogaan hawlo wax lagaga qabanayo dhinaca amaanka, ka dib markii muddooyinkii u dambeeyay qaraxyo khasaare dhaliyay ka dhaceen magaaladaas. Weftigu intii uu joogay halkaas, waxa uu kulamo la yeeshay odayaasha iyo waxgaradka gobolka Sool.saleban sahal salosahal@hotmail.com